You are here

ᑲᑎᒪᔩᑦ

ᐃᒃᓯᕙᐅᑕᖅ

ᐴᑦ ᕈᔅ ᐅᑭᐅᖅᑕᖅᑐᕐᒥ ᓄᓇᖃᖅᓯᒪᓕᖅᑐᖅ 1965−ᒥᓂᑦ ᓯᕗᓪᓕᖅᐹᒥ ᐃᓕᓴᐃᔨᐅᓪᓗᓂ, ᑭᖑᕐᖓᒍᑦ ᐃᓕᓴᐃᔨᓄᑦ ᐊᖓᔪᖅᑳᖑᓪᓗᓂ, ᑐᑭᒧᐊᒃᑎᑦᑎᔨᐅᓪᓗᓂᓗ ᕿᑭᖅᑖᓗᖕᒥ ᐃᓕᓐᓂᐊᖅᑐᓕᕆᔨᒻᒪᕆᒃᑯᑦ ᑲᑎᒪᔨᖏᓐᓄᑦ ᐊᒻᒪ ᐊᖓᔪᖅᑳᖑᓪᓗᓂ ᓯᓚᑦᑐᓴᕐᕕᖕᒧᑦ.  ᐃᖅᑲᓇᐃᔭᖅᓯᒪᔪᖅ ᓄᓇᕗᒥ ᒐᕙᒪᒃᓴᓕᕆᔨᒃᑯᓐᓄᑦ ᐊᕐᕌᒍᓄᑦ ᑕᓪᓕᒪᓄᑦ.  ᓄᓕᐊᓂᓚᐅᖅᓯᒪᔪᖅ ᑲᑎᑎᑕᐅᓪᓗᓂ ᔪᐋᓐᒧᑦ 1967−ᖑᑎᓪᓗᒍ.  ᒪᕐᕉᖕᓂᒃ ᕿᑐᕐᖓᖃᖅᑑᒃ, ᐅᑭᐊᖃᖅᑐᑦ ᐊᒻᒪ ᒪᕐᕉᖕᓂᒃ ᐊᖑᑏᖕᓂᒃ ᐃᕐᖑᑕᖃᖅᑑᒃ ᓄᓇᕗᒥ ᓄᓇᖃᖅᑐᓂᒃ ᒫᓐᓇ.  ᐴᑦ ᐃᖅᑲᓇᔮᒥᓂᒃ ᓄᖅᑲᓚᐅᖅᓯᒪᔪᖅ ᐃᓐᓇᐅᓂᕐᒧᑦ 1999−ᖑᑎᓪᓗᒍ ᑭᓯᐊᓂᓕ ᖃᐅᔨᒪᔨᑕᐅᓪᓗᓂ ᐃᖅᑲᓇᐃᔭᖃᑦᑕᖅᓯᒪᓕᖅᑐᖅ ᑭᖑᕐᖓᒍᑦ ᐊᔾᔨᒌᖏᑦᑐᓂᒃ.  ᐴᑦ ᕉᔅ ᑎᒃᑯᐊᖅᑕᐅᓚᐅᖅᑐᖅ ᓄᓇᕗᒥ ᓄᓇᓄᑦ ᐱᔪᓐᓇᐅᓯᕆᓂᕐᒧᑦ ᑲᑎᒪᔨᖏᓐᓄᑦ ᐃᒃᓯᕙᐅᑕᐅᑲᐃᓐᓇᕐᓂᐊᕐᓗᓂ ᓯᑎᐱᕆ 20, 2008−ᖑᑎᓪᓗᒍ ᐊᒻᒪᓗ ᐃᒃᓯᕙᐅᑕᐅᓂᕐᒧᑦ ᑎᒃᑯᐊᖅᑕᐅᓚᐅᖅᑐᖅ ᐄᑉᐳ 16, 2013−ᖑᑎᓪᓗᒍ.

ᐃᒃᓯᕙᐅᑕᐅᑉ ᑐᖏᓕᖓ

 ᔮᓐ ᒧᕇᔅ ᐃᒃᐱᐊᕐᔪᖕᒥᐅᑕᐅᖃᑦᑕᖅᓯᒪᔪᖅ 1975−ᒥᓂᑦ (ᐊᒡᖥᕕ`ᒥ, ᐃᒡᓗᓕᖕᒥ ᐊᒻᒪ ᐃᖃᓗᖕᓂ ᓄᓇᖃᖃᑦᑕᖅᓯᒪᔪᖅ).  ᐃᓐᓇᐅᓂᕐᒧᑦ ᓄᖅᑲᖓᓕᖅᑐᖅ ᐃᓕᓴᐃᔨᐅᓂᕐᒧᑦ (32−ᓄᑦ ᐊᕐᕌᒍᓄᑦ ᐊᒻᒪ ᐅᓪᓗᓄᑦ 65−ᓄᑦ ᒐᕙᒪᒃᑯᓐᓄᑦ ᐃᖅᑲᓇᐃᔭᖅᓯᒪᓕᖅᑐᖅ ᓄᓇᑦᑎᐊᕐᒥ ᐊᒻᒪ ᓄᓇᕗᒥ) ᐊᒻᒪ ᐊᖓᔪᖅᑳᖑᓪᓗᓂ ᐊᒻᒪ ᐃᓕᓴᐃᖃᑦᑕᓚᐅᖅᑐᖅ ᓱᒃᑲᓴᐅᔾᔪᐊᖅᑎᓂᒃ ᓯᐊᕐᕆᔮᖅᑎᓂᒃ ᓄᓇᕗᒥ, ᔮᓐ ᐃᓚᒋᔭᐅᓚᐅᖅᑐᖅ ᓴᖅᑭᑦᑎᖃᑕᐅᓪᓗᓂ ᓄᓇᕗᒥ ᐃᓕᓴᐃᔨᑦ ᑲᑐᔾᔨᖃᑎᒌᖏᓐᓂᒃ 19094-ᖑᑎᓪᓗᒍ, ᑐᓂᓐᖑᐊᖑᑎᑕᐅᓚᐅᖅᓯᒪᔪᖅ 2010−ᖑᑎᓪᓗᒍ ᐊᒻᒪᓗ ᐃᒃᓯᕙᐅᑕᐅᖃᑕᐅᓪᓗᓂ ᓄᓇᕗᒥ ᓄᓇᓄᑦ ᐱᔪᓐᓇᐅᓯᕆᓂᕐᒧᑦ ᑲᑎᒪᔨᖏᓐᓄᑦ (ᑲᑎᒪᔨᐅᖃᑕᐅᓯᒪᓕᖅᑐᖅ ᓄᕕᐱᕆ 2010−ᒥᓂᑦ).  ᐊᒻᒪ ᐃᓚᒋᔭᐅᓯᒪᔪᖅ ᑲᑎᒪᔨᖏᓐᓄᑦ ᐃᒥᐊᓗᓕᕆᓂᕐᒧᑦ ᓚᐃᓴᓐᓯᑖᖅᑎᑦᑎᔨᒃᑯᓐᓄᑦ, ᓄᓇᕗᒥ ᐃᖅᑲᓇᐃᔮᓂᒃ ᐊᔾᔨᒌᓂᒃ ᒪᓕᒐᖃᖅᑎᑦᑎᓂᕐᒧᑦ ᑲᑎᒪᔨᖏᓐᓄᑦ, ᐊᒻᒪ ᐱᓐᖑᐊᖅᑐᓕᕆᔨᒃᑯᓐᓄᑦ ᐃᖃᓗᐃᑦ ᓄᓇᓕᖅᐸᐅᔭᖏᑕ ᑲᑎᒪᔨᖏᓐᓄᑦ.  ᓄᓕᐊᖃᖅᑐᖅ ᑎᓴᒪᓂᒃ ᕿᑐᕐᖓᖃᖅᑐᑦ ᐊᒻᒪ ᒪᕐᕉᖕᓂᒃ ᐃᕐᖑᑕᖃᖅᑐᑦ ᐊᕐᓇᖕᓂᒃ.

ᑲᑎᒪᔨ

ᐃᓕᓴᐱ ᖃᕆᑕᖅ ᐊᕐᕕᐊᕐᒥᐅᑕᐅᔪᖅ ᐊᒻᒪ ᐃᓅᓯᓕᒫᖅ ᑕᐅᕙᓂ ᓄᓇᖃᖅᓯᒪᓪᓗᓂ.  ᐃᓕᓴᐱ ᐃᓕᓴᔨᐅᓪᓗᓂ ᐃᖅᑲᓇᐃᔭᖅᑎᐅᖃᑦᑕᖅᓯᒪᔪᖅ ᐊᒻᒪ ᒫᓐᓇ ᐃᓕᓴᐃᔨᐅᓕᖅᑐᖅ ᔮᓐ ᐊᕐᓈᓗᒡᔪᐊᖅ ᐃᓕᓐᓂᐊᕐᕕᐊᓂ ᖁᕝᕙᓯᖕᓂᖅᓴᓄᑦ.  ᑐᓴᕈᒥᓇᖅᑐᖅ ᐃᓕᓴᐃᖃᑦᑕᕐᒪᑦ ᕿᑐᕐᖓᖏᓐᓂᑦ ᐃᓕᓴᖅᐸᓚᐅᖅᓯᒪᔭᕐᒪ.  ᐃᓕᓴᐱ ᑲᑎᒪᔨᐅᖃᑕᐅᔪᖅ ᓄᓇᕗᑦ ᓯᕗᓂᒃᓴᕗᑦ ᑲᑎᒪᔨᖏᓐᓄᑦ ᐊᕐᕌᒍᓄᑦ ᖁᓕᓄᑦ, ᐊᒻᒪ ᓄᑖᖑᓂᖅᐹᖑᓪᓗᓂ ᑲᑎᒪᔨᐅᖃᑕᐅᓕᖅᑐᖅ ᓄᓇᕗᒥ ᓄᓇᓄᑦ ᐱᔪᓐᓇᐅᓯᕆᓂᕐᒧᑦ ᑲᑎᒪᔨᖏᓐᓄᑦ, ᓂᕆᐅᑦᑎᐊᖅᑐᖅ ᐃᓕᓐᓂᐊᕐᓂᐊᕐᓂᕆᔭᖓᓂᒃ ᐊᒻᒪᓗ ᐃᑲᔪᖃᑦᑕᕐᓂᐊᕐᓂᕆᔭᖓᓂᒃ ᑲᑎᒪᔨᓂᒃ ᐱᓕᕆᐊᖃᖅᑎᓪᓗᒋᑦ ᓄᓇᕗᒥ ᓄᓇᓕᕆᓂᕐᒧᑦ.

ᐃᓕᓴᐱ ᖃᕆᑕᖅ ᑲᑎᒪᔨᐅᖃᑕᐅᓯᒪᓕᖅᑐᖅ ᓄᓇᕗᒥ ᓄᓇᓄᑦ ᐱᔪᓐᓇᐅᓯᕆᓂᕐᒧᑦ ᑲᑎᒪᖏᓐᓄᓂᑦ 2012−ᒥᓂᑦ.

ᑲᑎᒪᔨ

ᐋᑐᕇ ᑕᐅᑐ ᐃᖅᑲᓇᐃᔮᒥᓂᒃ ᓄᖅᑲᖓᓕᖅᑐᖅ ᐃᓐᓇᐅᓂᕐᒧᑦ ᐊᒻᒪ ᑎᑎᕋᕐᕕᖕᒥ ᓴᓇᔨᐅᕙᓚᐅᖅᑐᖅ ᑎᑎᕋᖅᑎᐅᓪᓗᓂ, ᓄᓇᑦᓯᐊᑉ ᒐᕙᒪᒃᑯᖏᓐᓄᑦ, ᐊᓪᓚᕕᖕᒥ ᐊᐅᓚᑦᑎᔨᐅᓪᓗᓂ, ᓄᓇᑦᑎᐊᑉ ᒐᕙᒪᒃᑯᖏᓐᓂ, ᓯᕗᓕᖅᑎᓄᑦ ᐊᐅᓚᑦᓯᔨᐅᓪᓗᓂ, ᑭᕙᓪᓕᑉᒥ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ, ᐱᕙᓪᓕᐊᔪᓕᕆᔨᐅᓯᒪᓪᓗᓂ, ᕼᐊᒪᓚᒃᑯᓐᓂ, ᑎᑎᕋᖅᑎᐅᓯᒪᔪᖅ ᕼᐊᓚᒃᑯᓐᓄᑦ, ᐊᒻᒪ ᑮᓇᐅᔭᓕᕆᔨ ᑎᑎᕋᖅᑎᐅᓂᑯ ᐃᓕᓐᓂᐊᖅᑐᓕᕆᔨᒃᑯᓐᓄᑦ, ᐃᑲᔪᖅᑎᐅᓯᒪᔪᖅ ᓂᕈᐊᖅᑕᐅᓯᒪᔪᒧᑦ ᑎᑎᕋᖅᑎᐅᓂᕐᒧᑦ, ᓇᓄᓕᒃ ᓂᕈᐊᖅᑕᐅᒪᕕᐊᓄᑦ, Shear Minerals - ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐃᓕᓐᓂᐊᖅᓯᒪᔪᖅ, Agnico- Eagle − ᐃᓄᐃᑦ ᖃᐅᒪᔭᑐᖃᖏᓐᓂᒃ ᖃᐅᔨᓴᐃᓂᕐᒧᑦ ᑐᑭᒧᐊᒃᑎᓯᔨᐅᓂᑯ/ᑎᑎᕋᖅᓯᒪᔪᖅ ᐅᓂᒃᑳᓕᐊᓂᒃ, ᐃᖅᑲᖅᑐᐃᔨᕋᓛᖑᓯᒪᓪᓗᓂᓗ ᐃᒡᓗᓕᒑᕐᔪᖕᒥ ᓄᓇᕗᒧᑦ.  ᐋᓐᑐᕇ ᑲᑎᑎᑕᐅᓯᒪᔪᖅ ᓄᓕᐊᒥᓄᑦ 7−ᓂᒃ ᕿᑐᕐᖓᖃᖅᑐᑦ ᐊᑕᐅᓯᕐᒥᒃ ᑎᒍᐊᖃᖅᑐᑦ. ᐋᓐᑐᕇ ᐃᓕᓐᓂᐊᕐᓂᕐᒥᓂᒃ 9−ᒧᑦ ᐃᓕᓯᒪᔪᖅ, ᑮᓇᐅᔭᓕᕆᔨᐅᓂᕐᒧᑦ ᐊᓪᓚᕕᓕᕆᔨᐅᓂᕐᒧᓪᓗ, ᑐᐊᕕᕐᓇᖅᑐᓕᕆᔨᐅᓂᕐᒧᓪᓗ ᐸᕐᓇᐃᔨᐅᖃᑕᐅᓯᒪᓪᓗᓂ, ᐊᐅᓚᐅᓯᕆᔨᐅᓪᓗᓂ ᐅᐊᔭᓕᕆᔨᐅᓪᓗᓂᓗ.  ᐋᓐᑐᕇ ᑕᐅᑐ ᑲᑎᒪᔨᐅᖃᑕᐅᓯᒪᓕᖅᑐᖅ ᓄᓇᕗᒥ ᓄᓇᓄᑦ ᐱᔪᓐᓇᐅᓯᕈᕆᓂᕐᒧᑦ ᑕᐃᒪᓐᖓᓂᑦ ᐋᒡᒌᓯ 2011−ᒥᓂᑦ.

ᑲᑎᒪᔨᐅᖃᑕᖅ

ᒦᖃ ᖃᖁᓪᓗᖅ ᐃᓅᓚᐅᖅᑐᖅ ᐸᓪᓗᕐᕕᖕᒥ, ᕿᑭᖅᑖᓗᖕᒥ. ᓄᖃᖓᓕᖅᑐᖅ ᐃᓕᓴᐃᔨᐅᕙᓚᐅᕐᓂᕐᒥᒃ ᐱᔭᕇᕋᒥ (37-ᓂᒃ ᐊᕐᕌᒍᓂᒃ ᐃᖃᓇᐃᔮᕆᓚᐅᖅᓱᓂᐅᒃ) ᓄᓇᖃᖅᓱᓂ ᐋᑐᕚ, ᐋᓐᑎᐅᕆᔪᒥ.

ᒦᑲ ᐃᓕᓐᓂᐊᕌᓂᓚᐅᖅᑐᖅ ᐃᓕᓴᐃᔨᐅᓂᕐᒥᒃ ᐃᓕᓐᓂᐊᕈᑎᓂᒃ ᕗᐊᑦ ᓯᒥᑦᒥ, ᓄᓇᑦᓯᐊᕐᒥ 1976-ᖑᑎᓪᓗᒍ. ᐃᓕᓴᐃᖃᑦᑕᓚᐅᖅᑐᖅ ᐃᓕᓐᓂᐊᕆᐊᓕᓵᖅᑐᓂᒃ-ᐳᖅᑐᓂᓕᖕᓄᑦ ᐱᖓᔪᐊᓄᑦ 3-ᒧᑦ, ᐸᓐᓂᖅᑑᕐᒥ, ᕿᑭᖅᑕᕐᔪᐊᕐᓂ ᐊᒻᒪᓗ ᐃᖃᓗᖕᓂ. ᐃᖃᓇᐃᔮᖃᓚᐅᕐᒥᔪᖅ ᐃᓕᓐᓂᐊᕐᕕᖕᒥ ᐊᖓᔪᖃᑉ ᑐᖏᓕᖓᓄᑦ, ᔫᒥᐅᑉ ᐃᓕᓐᓂᐊᕐᕕᖓᓂ.

ᒦᑲ ᐃᓕᓐᓂᐊᕌᓂᒃᓯᒪᔪᖅ ᒪᒋᐅᓪᒥ ᐃᓕᓐᓂᐊᕐᕕᔾᔪᐊᕆᓂᖅᐹᖓᓐᓂ, ᓯᕗᓪᓕᕆᔭᐅᖃᑕᐅᓪᓗᓂᓗ ᐃᓕᓐᓂᐊᕌᓂᖄᓚᐅᖅᑐᓂ ᖁᑦᑎᖕᓂᖅᓴᐅᔪᓂᒃ ᒫᔅᑕᐅᓂᕋᖅᑕᐅᕙᑦᑐᓂᒃ ᐃᓕᓴᐃᔨᐅᓂᕐᒥᒃ ᐃᓕᓐᓂᐊᕈᑎᓂᒃ (ᐃᓕᓐᓂᐊᕐᕕᔾᔪᐊᖓᓐᓂᒃ PEI-ᒥ), 2009-ᖑᑎᓪᓗᒍ, ᐃᓚᒋᓪᓗᓂᐅᒃ ᐃᓕᓴᐱ ᖃᕆᑕᖅ.

ᒦᑲ ᕿᑐᖓᓕᒃ ᐱᖓᓱᓂᒃ, ᖁᓕᓂᒃ ᐃᕐᖑᑕᖃᖅᓱᓂ.