You are here

ᐱᓕᕆᐊᒃᓴᖏᑦ

ᓄᓇᕗᒥ ᓄᓇᓄᑦ ᐱᔪᓐᓇᐅᓯᕆᓂᕐᒧᑦ ᑲᑎᒪᔨᖏᑦ ᑭᒡᓕᓯᓂᐊᖃᑦᑕᕐᓂᐊᕐᓗᑎᒃ ᑲᑎᒪᔨᕈᖅᑕᐅᓯᒪᕗᖅ ᐊᑐᖅᑕᐅᓪᓗᑎᒃ ᐱᖁᔭᕐᔪᐊᖏᑦ ᑲᓇᑕᐅᑉ ᒐᕙᒪᒃᑯᖏᑕ.  ᑲᑎᒪᔨᑦ ᐱᕕᖃᖅᑎᑦᑎᖃᑦᑕᖅᑐᑦ ᐃᒻᒥᒃᑰᖅᑐᒥᒃ, ᐊᒻᒪ ᐃᓚᐃᓐᓈᕆᖏᑦᑐᒥᒃ ᐊᐅᓚᓂᖃᖅᑐᒥᒃ ᐱᕙᓪᓕᐊᑎᑦᑎᔨᑦ ᓲᕐᓗ ᑲᒻᐸᓂᐅᔪᑦ ᐊᒻᒪ ᓄᓇᕗᒥ ᓄᓇᓂᒃ ᓇᖕᒥᓂᖃᖅᑐᑦ ᐅᕝᕙᓘᓐᓃᑦ ᓄᓇᒥᒃ ᓇᔪᒐᖃᖅᑐᑦ  ᐊᖏᖃᑎᒌᒍᓐᓇᐃᓪᓕᑎᓪᓗᒋᑦ ᐱᔾᔪᑎᖃᕐᓗᑎᒃ ᐅᑎᖅᑎᑦᑎᕕᐅᓗᑎᒃ ᐊᑭᓕᐅᑎᒃᓴᐅᓂᐊᖅᑐᑦ ᐊᑭᖏᓐᓂᒃ ᐱᓕᕆᐊᖃᕐᓂᖏᓐᓄᑦ ᐃᓄᐃᑦ ᓄᓇᖁᑎᖏᑕ ᐃᓗᐊᓂ.  ᓄᓇᕗᒥ ᓄᓇᓂᒃ ᐱᔪᓐᓇᐅᓯᕆᓂᕐᒧᑦ ᑲᑎᒪᔨᖏᑦ ᐱᓕᕆᐊᒃᓴᖃᖅᐳᑦ ᐃᓱᒪᓕᐅᕈᑎᖃᕆᐊᖃᖅᐳᑦ ᒪᓕᒐᖃᖅᑎᑦᑎᓂᕐᒧᑦ ᐃᓯᕈᑎᓄᑦ ᐊᒻᒪ ᓄᓇᒧᑦ ᐅᐸᒍᑎᓂᖏᓐᓄᑦ, ᐃᓱᒪᓕᐅᕐᓗᑎᒃ ᐱᔪᓐᓇᐅᑎᒋᔭᖏᓐᓂᒃ ᐅᑯᐊ, ᐅᓄᕐᓂᕆᔭᖏᓐᓂᒃ ᐊᑭᓕᐅᑕᐅᓂᐊᖅᑐᑦ, ᓄᓇᒥᒃ ᓇᖕᒥᓂᖃᖅᑐᒧᑦ ᐊᒻᒪ ᐃᓱᒪᓕᐅᕐᓗᑎᒃ ᖃᔅᓯᓂᒃ ᐆᒪᔪᖃᕈᓐᓃᖅᑎᑦᑎᓂᖏᓐᓄᑦ ᓄᓇᕗᑦ ᐃᓗᐊᓂ ᐊᑭᓕᖅᓯᓂᐊᕐᒪᖔᑕ.

ᓄᓇᓄᑦ ᐱᔪᓐᓇᐅᓯᕆᓂᕐᒧᑦ ᑲᑎᒪᔨᖏᑦ ᓴᖅᑭᑕᐅᓯᒪᕗᑦ ᐊᑐᖅᑕᐅᓪᓗᑎᒃ ᓈᓴᐅᑎᖏᑦ 10 ᐊᒻᒪᓗ 21.8 ᓄᓇᕗᒥ ᓄᓇᑖᕈᑎᓄᑦ ᐊᖏᖃᑎᒌᒍᑎᓂ ᐊᒻᒪ ᒪᓕᒃᑕᐅᓪᓗᓂ ᓈᓴᐅᑎᖓ 99 ᓄᓇᕗᒥ ᐃᒪᕐᓄᑦ ᐊᒻᒪ ᓄᓇᓄᑦ ᐱᔪᓐᓇᐅᓯᕆᓂᕐᒧᑦ ᑲᑎᒪᔨᑦ ᐱᖁᔭᕐᔪᐊᖏᑦ, ᐱᓐᖑᖅᑎᑕᐅᓚᐅᖅᑐᑦ ᐄᑉᐳ 30, 2002−ᖑᑎᓪᓗᒍ.

ᐱᖁᔭᕐᔪᐊᖅ ᒪᓕᒐᖃᖅᑎᑦᑎᕗᖅ ᓈᓴᐅᑎᖏᑎᒍᑦ 3−ᒥᑦ ᑎᑭᓪᓗᒍ 11 ᑲᑎᒪᔨᓄᑦ, ᐱᖃᓯᐅᑎᓪᓗᒍ ᐃᒃᓯᕙᐅᑕᖅ ᑎᒃᑯᐊᖅᑕᐅᓯᒪᔪᖅ ᒥᓂᔅᑕᖓᓐᓄᑦ ᓄᓇᖃᖅᑳᖅᓯᒪᔪᓕᕆᓂᕐᒧᑦ ᐊᒻᒪ ᐅᑭᐅᖅᑕᖅᑐᕐᒥ ᐱᕙᓪᓕᐊᑎᑦᑎᓂᕐᒧᑦ (ᐃᓄᓕᕆᔨᑐᖃᒃᑯᑦ).  ᐃᒃᓯᕙᐅᑕᖓᑦ ᓂᕈᐊᖅᑕᐅᖃᑦᑕᖅᑐᑦ ᑲᑎᒪᔨᖏᓐᓄᑦ ᓄᓇᓄᑦ ᐱᔪᓐᓇᐅᓯᕆᔨᑦ.  ᐅᓄᖏᓐᓂᖅᐹᖑᓗᑎᒃ ᒪᕐᕉᒃ ᑲᑎᒪᔨᐅᖃᑕᐅᔫᒃ ᓄᓇᕗᒥᐅᑕᐅᔭᕆᐊᖃᖅᑑᒃ.